విశాఖపట్నం లోక్‌సభ ఎన్నికల ఫలితాల వార్తలు - Visakhapatnam Lok Sabha Constituency Election Result

ఆంధ్రప్రదేశ్‌లోని 25 లోక్‌సభ నియోజకవర్గాల్లో విశాఖపట్నం లోక్‌సభ స్థానం ఒకటి. ఈ లోక్‌సభ నియోజకవర్గ పరిథిలో ఏడు అసెంబ్లీ సెగ్మెంట్లు శృంగవరపుకోట, భీమిలి, విశాఖపట్నం తూర్పు, విశాఖపట్నం దక్షిణం, విశాఖపట్నం పశ్చిమ, విశాఖపట్నం ఉత్తరం, గాజువాక ఉన్నాయి. 2004లో కాంగ్రెస్ పార్టీ నుంచి నేదురుమల్లి జనార్థన్ రెడ్డి, 2009లో కాంగ్రెస్ పార్టీ నుంచి పురందేశ్వరి ఇక్కడి నుంచి విజయం సాధించారు. 2014లో నరేంద్ర మోదీ వేవ్ సమయంలో భారతీయ జనతా పార్టీ (బిజెపి) అభ్యర్థి కంభంపాటి హరిబాబు ఈ సీటును కైవసం చేసుకున్నారు. అయితే 2019 ఎన్నికల్లో వైఎస్సార్ కాంగ్రెస్ పార్టీ(వైసీపీ) అభ్యర్థి ఎంవీవీ సత్యనారాయణ ఇక్కడ విజయం సాధించింది. టీడీపీ అభ్యర్థి ఎం భరత్‌పై 4,414 ఓట్ల మెజార్టీతో ఎంవీవీ సత్యనారాయణ ఇక్కడి నుంచి గెలిచారు. ఎంవీవీ సత్యనారాయణకు 4,36,906 ఓట్లు దక్కగా.. భరత్‌కు 4,32,492 ఓట్లు పోల్ అయ్యాయి. నాటి ఎన్నికల్లో జనసేన పార్టీ నుంచి పోటీ చేసిన సీబీఐ మాజీ జేడీ లక్ష్మీనారాయణకు 2,88,874 ఓట్లు దక్కాయి.

విశాఖపట్నం ఆంధ్రప్రదేశ్‌లోని అతిపెద్ద, అత్యధిక జనాభా కలిగిన మెట్రోపాలిటన్ నగరం. ఇది తూర్పు కనుమలు, బంగాళాఖాతం తీరం మధ్య ఉంది. చెన్నై తర్వాత భారతదేశంలోని తూర్పు తీరంలో రెండవ అతిపెద్ద నగరం విశాఖపట్నం కావడం విశేషం. అలాగే దక్షిణ భారతదేశంలో నాల్గవ అతిపెద్ద నగరం కూడా ఇదే. తెలుగు ఇక్కడ అధికార భాష. స్థానిక ప్రజలు ఎక్కువగా తెలుగు భాష మాట్లాడతారు. 2011 జనాభా లెక్కల ప్రకారం ఇక్కడ జనాభా 20,91,811గా ఉంది.

విశాఖపట్నం లోక్‌సభ స్థానం ఎవరు, ఎప్పుడు గెలిచారు?

స్వాతంత్య్రానంతరం తొలిసారిగా 1952లో విశాఖపట్నం లోక్‌సభ స్థానానికి ఎన్నికలు జరిగాయి, అందులో స్వతంత్ర అభ్యర్థి విజయం సాధించారు. ఆ తర్వాత 1957, 1962, 1967, 1971, 1977, 1980లో కాంగ్రెస్ విజయ పతాకాన్ని ఎగురవేసింది. 1984లో తెలుగుదేశం పార్టీ (టీడీపీ) గెలిచినా, 1989లో కాంగ్రెస్ పునరాగమనం చేసి 1991లో టీడీపీ చేతిలో ఓడిపోయింది. 1996, 1998లో మళ్లీ కాంగ్రెస్ గెలుపొందగా, 1999లో మళ్లీ టీడీపీ గెలిచింది. 2004 నుంచి 2009 వరకు కాంగ్రెస్‌ విజయం సాధించగా, 2014లో మోదీ వేవ్‌లో తొలిసారి బీజేపీ విజయం సాధించింది. ఆ తర్వాత 2019లో వైఎస్సార్‌ కాంగ్రెస్‌ పార్టీ విజయం సాధించింది.